MCHEZAJI ANAYENG'ARA DUBAI AKITOKEA MWANZA

 

Mchezaji wa zamani wa Yanga, Abdallah Yassin ambaye alikuwa akichezea timu ya Fanja ya nchini Dubai, anatarajia kuondoka kesho kutwa kuelekea Norway kwaajili ya majaribio ya kucheza soka la kulipwa.

 

Akizungumza jana jijini hapa, Abdallah alisema kuwa, anakwenda Norway kufanya majaribio ya kucheza soka la kulipwa.

“Nimeondoka Yanga miaka miwili iliyopita, nikaenda Dubai nilipocheza soka la kulipwa kwa miaka miwili na sasa meneja wangu ambaye ni kaka yangu Ostadhi Juma na Musoma, ameniambia tukutane Dar es Salaam kwaajili ya kwenda Norway kufanya majaribio ya kucheza soka la kulipwa” alisema Abdallah.

“Nakwenda kufanya majaribio Norway si kwamba Dubai walikuwa hawanilipi vizuri, hapana ila natafuta maslahi mazuri zaidi na huduma nzuri zaidi kwani umri unakwenda na ndoto lazima zitimie kupitia soka”alisisitiza.

Na kuongeza kuwa, aliondoka Yanga kwasababu hakuwa akilipwa mshahara ila alikuwa akipewa posho, Fanja alikuwa akilipwa mshahara mzuri ila hawezi kuwasahau viongozi Ayub Nyenzi na Lucas Kisasa waliomsomesha katika Sekondari ya Makongo na baadaye kuichezea Yanga.

Huku akiamini siku moja atakuja kuitumikian timu ya taifa “Taifa stars” kwani anapenda sana kuichezea timu hiyo, licha ya kutowahi kupata nafasi katika kikosi hicho.

“Nilikuwa na ndoto za kwenda Ulaya miaka mingi na nilishawahi kupata nafasi ila kutokana na uloho wa baadhi ya viongozi ndoto hazikutimia, wakati huo tukiwa Makongo chini ya kocha marehemu James Kiiza”aliongeza.

 

“Tuliwahi kuhitajika na wachezaji wa zamani wa Liverpool Less Ferdinand na John Banzi ili kucheza Ulaya lakini walipokuja walikuta hali si sawa na makubaliano waliyowekeana na viongozi Jack Pemba na Idd Kipingu; kwa madai kuwa walitoa fedha nyingi ili tupate matunzo mazuri mimi na Jerry Tegete, Nelson Kimati, Mustapha Mabrouk na Kigi Makasy”anasema Abdallah.

Abdallah Yassin (22) ni mzaliwa wa eneo la Bugando Mwanza, akitokea katika timu ya Chipukizi fc ya Mwanza kabla ya kujiunga na Makongo Sekondari na baadaye kuichezea timu ya Yanga kuanzia mwaka 2009 akiwa kidato cha tatu hadi mwaka 2011 alipoamua kujiunga na Fanja ya nchini Dubai.