LEO NI TOTO AU VIPER YA UGANDA

Timu ya Toto Afrikan ya jijini hapa inatarajia kujipima ubavu dhidi ya mabingwa wa ligi kuu ya Uganda Viper  FC katika mchezo wa kirafiki utakaochezwa kwenye dimba la CCM Kirumba leo.

Mabingwa hao kutoka Uganda, Viper wanashuka dimbani baada ya kuilaza Mbeya city 4-1 jijini Dar es Salaam, huku Toto wakiwa wamepoteza dhidi ya Stand United 1-0.

Akizungumza na waandishi wa habari, kaimu mwenyekiti wa Toto Afrikan Kenneth Petro alisema kuwa, mchezo huo ni wa kimataifa  na wanaamini kuwa ni kipimo sahihi kwa Toto.

“Toto ni timu kubwa na lengo la usajili huu ni kuipandisha timu ligi kuu lakini pia kucheza soka kwa kiwango cha kimataifa ili tutakapokuwa mabingwa wa Tanzania basi tuweze kuwakilisha vyema”alisema dkt.kenneth

Toto afrikan ambayo inajivunia usajili wake kwa msimu huu, inatarajia kuonyesha mashabiki kuwa usajili waliofanya ni sahihi na kuwahakikishia kuwa watapanda ligi kuu msimu ujao.

Huku akihakikishia wadau wa soka jijini hapa, kocha mkuu wa kikosi hicho ambaye ni baba mzazi wa mchezaji Jerry Tegete, John Tegete alisema kuwa, kikosi chake kipo fiti na ushindi si jambo la kuuliza.

“Tulipocheza na Stand United tulikuwa tumetoka kwenye mazoezi magumu lakini pia tulikuwa tumechoka na safari ila kwasasa timu ipo kambini na wanafanya mazoezi mepesi yanayoenda na mchezo wenyewe”alisema kocha Tegete.

Pia Makamu mwenyekiti alisema,  timu ya Viper inashiriki Ligi kuu nchini Uganda na kwamba msimu uliopita ilishika nafasi ya kwanza katika msimamo wa ligi kuu ya nchini humo, na baada ya mchezo huo wataelekea mkoani Shinyanga.

Kiingilio katika mchezo huo ni Sh3,000 kwa Sh5,000 jukwaa kuu.