MASHINDANO YA UMISETA NGAZI YA MKOA

Mashindano ya michezo kwa shule za Sekondari (UMISETA) ngazi ya mkoa yameanza kushika kasi kwa kuzikutanisha timu zote za wilaya saba za mkoa wa Mwanza katika viwanja vya shule za Sekondari za Nsumba na Ngaza.

Mashindano hayo, ambayo yanatazamiwa kutoa ushindani mkali kwa washiriki kutoka wilaya ya Nyamagana ambao walikuwa mabingwa msimu uliopita na mahasimu wao wilaya ya Ilemela waliomaliza nafasi ya pili.

Akizungumza na mwandishi wetu, Afisa habari wa Ilemela Bahati Kizito alisema kuwa, kwa mwaka huu wamejipanga kuhakikisha wanatwaa ubingwa wa mkoa ili kuonyesha kuwa wanaweza michezo licha ya uchanga wa wilaya yao kwani mashindano ya mwaka huu ni ya tatu toka kuanzishwa kwa halmashauri hiyo .

“Msimu uliopita tulimaliza nafasi ya tatu ila msimu huu tumejipanga kumaliza nafasi ya kwanza, pia kutoa wachezaji wengi watakaowakilisha mkoa katika mashindano ya kanda”alisema Kizito.

Na kuongeza kuwa, tayari wameahidiwa na Raisi wa zamani wa chama cha mpira wa wavu Musa Mzia, kupatiwa jezi kwa wachezaji wa mpira wa kikapu kila watakapo kuwa wakifanya vizuri katika mashindano kwa mchezo huo.

Pia alizitaja changamoto kubwa zinazowakabili kuwa ni baadhi ya shule hasa za Serikali kutoshiriki katika mashindano haya, hivyo kuwanyima fursa wanafunzi wao kuonesha vipaji pamoja na ukosefu wa vifaa vya michezo.

Mashindano hayo yanashirikisha  michezo ya mpira wa miguu, mpira wa kikapu, mpira wa wavu, mpira wa mikono, riadha, meza yote kwa wasichana na wavulana huku bao ni wavulana na mpira wa pete ni kwa wasichana pekee.

Kwa upande wa wilaya ya ilemela  jumla ya wanamichezo 125 na viongozi na walimu 12 wanashiriki  michuano hiyo, iliyoanza kutimua vumbi siku ya leo (Alhamisi).

Wilaya ya Ilemela mwaka 2013 ilishika nafasi ya pili kati ya mikoa saba iliyoshiriki, huku mwaka 2012 ilishika nafasi ya mwisho.

Huku mabingwa watetezi jiji wakiahidi kuendeleza ubabe kwa msimu huu, kwa kushinda zaidi ya msimu uliopita.