TOTO BADO KICHWA KINAUMA

Je, Toto inaweza kutimiza ndoto za kurudi ligi kuu kwa staili hii?

Kikosi cha Toto katika Ligi daraja la kwanza kilifanikiwa kushika nafasi ya tatu mbele ya Mwadui na Stand United katika kundi C na kufanya stand kupanda ligi kuu kwa kuongoza, katika ligi daraja la kwanza msimu uliopita.

Mbali na matokeo hayo mazuri yaliyochangiwa na uchaguzi mpya wa klabu hiyo ambapo viongozi hao waliikuta timu hiyo ikiwa katika nafasi ya pili kutoka mwisho katika msimamo wa kundi.

Maswali makubwa ya kujiuliza ni vipi viongozi hawa wanaweza kuipandisha ligi kuu msimu huu, licha ya usajili waliofanya msimu huu.

Mgogoro mkubwa unaonekana kuikumba klabu ya soka ya Toto Africans maarufu kwa jina la Wana-Kishamapanda inayoshiriki Ligi soka daraja la kwanza Tanzania Bara, baada ya Mwenyekiti wa klabu hiyo,Omari Said Mbalamwezi kuandika barua rasmi ya kujiuzulu nafasi hiyo Agosti mosi mwaka huu

Mbalamwezi amejiuzulu nafasi hiyo huku akieleza wazi kwenye barua yake kuwa,ni kushindwa kuwajibika ipasavyo kwenye nafasi yake kutokana na Makamu Mwenyekiti kutomshirikisha katika yale yanayoendelea kwenye klabu hiyo.

Akizungumza na gazeti hili jijini Mwanza, Makamu mwenyekiti wa klabu hiyo, Ahmed Waziri Gao  alisema kuwa, kujiuzulu kwa Mbalamwezi ni kutokana na kuwa na majukumu mengi na bado wanajipanga kukaa katika kikao ili kuijadili barua hiyo.

“Tunajiandaa kukutana ili kuijadili hatma ya kiongozi huyo ambaye kwa barua tuliyoipata sisi amedai kuwa anajiuzulu kutokana na kuwa na majukumu mengi ambayo yamechangia kuchukua uamuzi huo”alisema Gao.

Tayari aliyekuwa mwenyekiti wa klabu hiyo, Omary Mbalamwezi ametangaza kujiuzulu na bado majibu ya kamati tendaji yakisubiriwa.

Sababu kubwa zilizochangia klabu ya Toto Afrika ya jijini Mwanza kushuka daraja msimu wa 2012/2013 ni kukosa pesa ya nauli ya kuwatoa uwanja wa CCM Kirumba kwenda kambini kwao nje ya uwanja wa CCM kirumba kama kilomita  mbili kutoka uwanjani.

Toto Afrika walifika kwenye hali ya kukosa mpaka viatu vya wachezaji, mara kadhaa mwalimu wa timu hiyo John Tegete alikuwa akilalama timu yake kutingwa na umasikini uliopitiliza hali iliyosababisha wachezaji wa timu hiyo kujikuta wakicheza bila kupata mlo stahiki.

Tegete alipata kunukuliwa akisema kuwa, wachezaji wake wamekuwa wakicheza huku wakiwa na njaa.

Lakini Makamu huyo  amesema kuwa,  Ligi Daraja la Kwanza ni  ngumu kuliko Ligi Kuu, kitu ambacho kinamfanya kujipa changamoto ya kubaki Ligi Kuu ikiwa atafanikiwa kupanda msimu ujao.

“Sisi tunakutana na wadau mbalimbali kwa lengo la kuipandisha Toto na kwasasa hatuna shida ya pesa, ila tayari tumejipanga na tumepiga hesabu na kubaini kuwa ili kukamilisha ligi daraja la kwanza tunahitaji Sh150mil ambazo tunazo, pia tumepata jezi kutoka Isejele Sports ya Marekani huku wakituahidi kutuletea basi kama tutafanya vizuri ndiyo maana tunajipanga kufanya vizuri,”alisema Gao.

Hali hii imekuwa ikitumiwa kwa miaka kadhaa sasa licha ya kuwa na pango ambalo limekodishwa kwa wafanyabiashara wa maduka, huku wakiendelea kutaabika hata ofisi hawana.

Ni matarajio ya vilabu kuona mashabiki wanaviunga mkono kwa kujitokeza kwa wingi kushuhudia mechi zao ili kutunisha mfuko wa vilabu.

Moja na dosari kubwa kwenye timu hii  ni uhaba wa mashabiki wanaojitokeza uwanjani.

Kumekuwa na mwitikio mdogo wa mashabiki kwenye viwanja kushuhudia mechi za timu yao, hali ambayo imekuwa ikiviathiri vilabu ambavyo vingi vinavyotegemea mapato ya milangoni kujiendesha.

Wakati huohuo, kocha wa timu hiyo John Tegete  alisema kuwa,  pamoja na kuwapo kwa ushindani katika Ligi daraja la kwanza, ugumu wake ni mdogo kutokana na usajili waliofanya msimu huu na ndoto walizonazo viongozi wa sasa.

“Unajua Daraja la Kwanza ni ngumu kuliko Ligi Kuu, ukishapanda ukafanya mikakati ya kutoshuka daraja pekee, lakini huku inatakiwa timu moja pekee, hapo ndipo kuna kazi, ila kwasasa naona kama nafanya kazi na watu ambao wana nia ya kuipeleka kule wanakotaka ifike” alisema Tegete.

Akizungumzia timu hiyo kukosa nafasi ya kupanda Ligi Kuu msimu uliopita, kocha huyo alisema wameshajua upungufu wao uliosababisha hilo, kitu ambacho wameanza kujipanga kwenye ligi yao msimu huu.

Mchezaji ambaye ameamua kurudi nyumbani, Ladislaus Mbogo alisema kuwa, wamerudi ili kushirikiana kuipandisha timu ligi kuu kwani ni aibu kusifika nje wakati mkoa uliozaliwa unaendelea kukosa pato linalotokana na soka.

“Mbele ya ukuta wa Toto ukiongozwa na mimi (Ladislaus Mbogo) hakuna atakayefurukuta wala kujaribu kupenya, naamini kikosi cha sasa kipo imara na tumekuja kushinda tu ili kurejea ligi kuu”alisema Mbogo. 

Kwa upande wa mashabiki, ni matarajio yao kuona klabu  yao ikionesha uwezo wa hali ya juu utakawakosha mashabiki walioamua kukimbilia Ligi za Ulaya wanapohisi kuna ladha tofauti na hapa nyumbani, huku wakitupa mikono nyuma linapokuja suala la kuchangia pato la timu.

Bado najaribu kuangalia kama njia ipi itatatua tatizo hili la muda mrefu ambalo limekuwa likiendelea kuwepo, Toto huanza vizuri sana hasa wakati wakijua wanahitaji kitu ila baada ya muda wanaanza kupitisha bakuli. 

Toto Afrikans ambayo ilianzishwa mwaka 1938, inatarajiwa kucheza mechi 48 ikiwa kundi B lenye  timu za Burkina Faso, Geita Veterans SC, Green Warriors, Kanembwa JKT, Mwadui SC, Oljoro JKT, Panone FC, Polisi Dodoma, Polisi Mara, Polisi Tabora  na  Rhino Rangers.

Toto wamedai kuwa hawatasajili tena msimu wa dirisha dogo kwani tayari wamewagawa wachezaji wao katika makundi matatu ambayo ni Ng’wanza, Gemin na Sangara ambaye ni samaki anayeheshimiwa na wakazi wa kanda ya Ziwa kwa kuwasaidia wakati wa shida yaani Mkombozi.

Huku wakidai kuwa sasa wanakuja na mfumo wa Football yaani mchezo unaotumiwa na nchi ya Ujerumani, na kuachana na Soccer ambao ni mfumo unaotumiwa na Uingereza.