NGASSA BADO NYOTA INA NG'AA

Licha ya kushinda mabao 3-0, kiungo mshambuliaji wa Yanga, Mrisho Ngassa, amefunguka kuwa, Azam ilicheza vizuri zaidi yao katika mechi ya Ngao ya Jamii, Jumapili iliyopita kwenye Uwanja wa Taifa.

Ngassa amesema kuwa Azam walionyesha kiwango kikubwa kipindi cha kwanza na Yanga walicheza kawaida sana.

Aliongeza kuwa, tatizo lililosababisha wasifunge mabao kipindi cha kwanza ilitokana na mshambuliaji wao, Mbrazili, Geilson Santana ‘Jaja’ kutotokea mapema kwenye boksi kwa ajili ya kuunganisha krosi.

“Inaniuma kwa kuwa sijafunga bao lolote licha ya kupata nafasi nyingi lakini ilinitokea kwa bahati mbaya.”

Katika mechi hiyo, Yanga ilibanwa sana katika kipindi cha kwanza, lakini Azam FC wakashindwa kuzitumia nafasi walizozipata.

katika kipindi cha pili, ngoma ikabadilika na Yanga kutawala huku wakifanikiwa kupata mabao matatu yaliyoinyamazisha Azam FC.

MSHAMBULIAJI Mrisho Khalfan Ngassa  ameshinda taji la tisa tangu aanze kucheza soka ya ushindani, kufuatia kuiongoza Yanga SC kushinda mabao 3-0 katika mchezo wa Ngao ya Jamii dhidi ya Azam FC.

Ngassa jana ametimiza jumla ya mataji matano aliyowahi kushinda na Yanga SC katika awamu mbili alizochezea klabu hiyo.

Ngassa alijiunga na Yanga SC mwaka 2007 na kabla hajahamia Azam FC alishinda mataji matatu Jangwani, ubingwa wa Ligi Kuu mara mbili na Kombe la Tusker mara moja.

MATAJI ALIYOWAHI KUSHINDA MRISHO NGASSA

2006 Tusker Kagera Sugar

2008 Ligi Kuu Yanga SC

2009 Ligi Kuu Yanga SC

2009 Tusker Yanga SC

2010 Challenge Kili Stars

2011 Mapinduzi Azam FC

2012: Ngao        Simba SC

2013 Ngao  Yanga SC

2014 Ngao Yanga SC

Wakati anaingia Yanga SC Ngassa alikuwa ameshinda taji moja tu, Kombe la Tusker akiwa na Kagera Sugar.

Na alipokwenda Azam FC mwaka 2010, Ngassa pamoja na kufanikiwa kuwa mfungaji bora wa Ligi Kuu, pia alishinda Kombe la Mapinduzi na klabu hiyo.   

Alipohamia Simba SC nako akashinda Ngao ya Jamii katika msimu mmoja wa kuitumikia na baada ya kurejea Yanga SC, ametwaa Ngao mara mbili mfululizo.

Hata hivyo, mwaka jana Ngassa alijiunga na wenzake kusherehekea ushindi wa Ngao kwa kuifunga Azam tena 1-0 akitokea jukwaani, kwa sababu alikuwa anatumikia adhabu.

Ngassa ambaye kwa sasa anaongoza kwa mabao katika Ligi ya Mabingwa Afrika, ingawa Yanga ilikwishatolewa mapema, pia amewahi kushinda Kombe la Challenge akiwa na Tanzania Bara, Kilimanjaro Stars.