TSC yaanza kuandaa kikosi cha kombe la dunia 2018

Mabingwa wa kombe la dunia 2014 kwa watoto wa mitaani nchini, timu ya Tanzania Street Childrens (TSC) wameanza ziara ya kusaka vipaji kwaajili ya kombe la dunia lijalo, baada ya kufanikiwa kutwaa kombe hilo mwaka huu nchini Brazil.

TSC wameanza kusaka vipaji hivyo kupitia programme ya Street Skills na School Programme ambazo zinahusisha watoto wanaoishi katika mitaa hususani katika maeneo ya Ilemela, Mjini kati na Mabatini.

 

Akizungumza na gazeti hili, katibu wa TSC Daniel Yangwe amebainisha kuwa, maandalizi haya ni sehemu ya kuhakikisha wanalitetea taji lao msimu ujao wa kombe la dunia.

“Lengo la Programme hizi zinalenga kuwaelimisha watoto kupitia soka kuwa kuishi katika mitaa kunachangia wao kuendelea kuwa maskini, lakini pia kupata vipaji ambavyo vitasaidia kupata timu itakayoshiriki katika michezo ya kutafuta mwakilishi wa Tanzania katika kombe la dunia msimu ujao”alisema Yangwe.

“Tumefanikiwa kupata watoto kumi ambao wanavipaji na tayari wameingia katika timu yetu ila bado tunaendelea kusaka vipaji ili wale ambao watapata elimu ya kutosha waweze kurejea makwao na wengine wakae kambini kwetu ambao hawana kabisa familia”alisongeza.

 

Programme hizi zina makocha wawili kila moja, huku zikijumuisha maeneo ya Kirumba katika uwanja wa Furahisha kwa wale wenye umri chini ya miaka 15 na miaka chini ya 18, Mjinin kati wanatumia uwanja wa Nyamagana kwa vijana wenye umri chini ya miaka 17 na chini ya miaka 12, huku kwa upande wa shule wakitumia shule za Sabasaba, Mwenge, Kitangiri na Igoma.